القسم حلو، ومواد سنة اولي في منها مواد متتطلب جامعة بالإضافة إلى مواد القسم عبارة عن مقدمة عن المجال زي دور المكتبة في خدمة المجتمع و تطور المكتبات، اما من اول سنة تانية تبدأ مواد التخصص و هي ممتعة زي تصنيف ١ و ٢ و وقواعد وصف المصادر ١ و٢ وفهرسة موضوعية وتكشيف و كمان بندرس مواد ليها علاقة بارتباط القسم بباقي الادارات زي العلاقات العامة والتسويق ومواد تحب إنك تعرف معلوماتها و العملي بتاعها جميل والمجال مفيش كتير يعرف عنه بس حقيقي هو ممتع و نتمني ان يكون في كورسات للناس العادية مش المتخصصين بس
حبيبة حسام طالبة بالفرقة الثالثة
رأيي البسيط ف القسم أنه عظيم من وجهه نظري ولكن مهدور حقه بين الاقسام التانية، كمان مواده العلمية لذيذه ومفيده بشكل كبير كتطبيق في ارض الواقع
صباح الشعراوي طالبة بالفرقة الثالثة
رأيي إن المواد سهلة الى حد ما، في سنة أولى خصوصا أنه بيمهدك لما هو قادم عكس أقسام وكليات كتير تانية بتخلى الطلاب تتصدم فى سنه اولى ويكرهوا الدراسة
سيف نبيل طالب بالفرقة الأولى
مجال المكتبات والمعلومات يعتبر من اهم المجالات اللي تقدر تواكب العصر من تطور تكنولوجي دا بسبب تداخل المجال مع اغلب المجالات زي المتاحف والبرمجة وتصميم المواقع والنظم الآلية، والمجال نفسه أقدر أستفيد منه لو طورت من نفسي خارج اطار الدراسة بمعنى لو معايا لغة ومهارات تكنولوجية أقدر أزود فرصي في العمل، وده مفيد جداً في عصر التحول الرقمي وزي ما شوفنا في فترة الكورونا زاد الاهتمام بدرجة كبيرة جداً بالتعامل عن طريق الشكل اللإلكتروني.
سارة محمد طالبة بالفرقة الرابعة
عند الترشح لقسم المكتبات والمعلومات لم أكن أعلم بوجود هذا القسم وقتها وكان هذا القسم بدون شروط ولكني كنت منزعج بخصوصه لأنني كنت أعتقد أنه قسم ليس له أهمية، ولكن عند تعريف الدكاترة بأهمية هذا القسم، وإدراكي لأهميته مع الوقت أحببت هذا القسم واكتشفت ان هذا القسم يلبي حاجاتي في حب المعرفة فقمت بربط المواد التي اتعلمها من ذلك القسم مع انشطة مختلفة وانشأت مركز خاص يخدم الاطفال وذوي الاحتياجات الخاصة
ماركو سمير طالب بالفرقة الرابعة
بالنسبة للقسم ف هو قسم مفيد جدا في كل المجالات اقدر من خلاله اساعد مجالات كتير و بندرس مش بس حاجات التخصص بتاعنا كمان بناخد حاجات تساعدنا في مجالات تانية زي العلاقات العامة و قواعد البيانات و التسويق و هكذا
فاطمة أحمد طالبة بالفرقة الثالثة
هو الحقيقة انا شايف ان القسم مش اسهل قسم زى مابيقولو، بالعكس القسم بتاعنا محتاج مجهود كبير لكنه ممتع ومعلوماته كتير وتفيدك فى حياتك حتى لو ماشتغلتش بشهادتك بيفتحلك مجالات تانية
محمد دسوقي طالب بالفرقة الرابعة
القسم كويس جدا كدراسة ومجال مستمر، معتقدش أنه هينتهي، لأن مهما اختلفت اشكال وطرق الاحتفاظ بالمعلومات لازم يكون فيه ناس متخصصة وفاهمة ازاي تقدر تستخدم الطرق دي، يمكن العيب الوحيد اللي بشوفه في الدراسة أن مفيش تطبيقات عملية على بعض مواد التخصص، ومفيش معامل خاصة بينا وحتى استخدامنا لمعامل الحاسب الالي قليل وأتمنى يتم الاهتمام بهذا الجانب في جامعة عين شمس، لكن اللي يحب يدور ويفهم المجال هيكتشف أنه حاجة تانية خالص برة، وبتمنى يكون في اهتمام بيه في مصر زي ما في اهتمام بيه في كذا دولة عربية حاليًا.
رجاء ذكي طالبة بالفرقة الثالثة
من رأيي أن مستقبل المكتبات والمعلومات ملئ بالمفاجئات و لكن لا يأتي ذلك إلا من بعد تطوير النفس و الذات في قسم المكتبات نقوم بدراسه عدة مناهج تكنولوجية قد تكون هي مستقبل المكتبات والمعلومات و البدأ في التطور الرقمي من دراسه الشبكات ، قواعد البيانات، تحليل النظم، الفهرسة الالكترونية، وغيرها من المواد المفيدة للتطور و ليس فقط في مجال التكنولوجيا بل وفي شتي العلوم الأخري مثل دراسه المواد المرجعيه و كيفيه عملها -- ودراسه مجال المكتبات والمعلومات له فرص عمل عظيمة في بعض دول الوطن العربي وليس ذلك فقط وإنما في معظم دول العالم -- ودراسة المكتبات ليست مقتصرة فقط علي كونك أميناً للمكتبة و إنما هناك مجالات أوسع بكثير علينا فقط الاستكشاف و المثابرة و التوسع في الابتكار في هذا العلم و التقدم لمستقبل يرقي الي المجتمع
تعليقات
إرسال تعليق